Thank you for reading this post, don't forget to subscribe!
रवि लामिछानेले सांसदलाई के भने? अनुशासन, जिम्मेवारी र जनताप्रति उत्तरदायी हुन निर्देशन
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले नव–निर्वाचित सांसदहरूलाई अनुशासनमा बसेर जनताप्रति जिम्मेवार ढंगले काम गर्न निर्देशन दिएका छन्। सांसदहरूलाई सम्बोधन गर्दै उनले संसदमा जाने प्रतिनिधिहरूले पदको घमण्ड नगरी जनताको अपेक्षा अनुसार काम गर्नुपर्नेमा जोड दिए।
लामिछानेले सांसदहरूले गल्ती गरेमा पार्टीले कडा कदम चाल्ने चेतावनी पनि दिएका छन्। उनले ‘राइट टु रिकॉल’ जस्तै कडा अनुशासनात्मक व्यवस्थासहित काम गर्नुपर्ने संकेत गर्दै सांसदहरूले जिम्मेवारी बिर्सन नहुने बताए।
उनका अनुसार सांसदहरू सोफामा बस्ने वा गफ गरेर समय बिताउने होइन, गाउँ–टोलमा पुगेर जनताको कुरा सुन्ने प्रतिनिधि हुन्। नागरिकले भोगिरहेका समस्या समाधान गर्ने जिम्मेवारी सांसदकै काँधमा रहेको उनले उल्लेख गरे।
त्यसैगरी उनले अरूलाई ज्ञान बाँड्नुअघि संसदिय प्रक्रिया, नीति तथा जनसरोकारका विषयमा निरन्तर अध्ययन गर्न पनि सांसदहरूलाई आग्रह गरे। आलोचनालाई गालीगलौज गरेर होइन, मर्यादित ढंगले स्वीकार गर्नुपर्ने पनि उनले बताए।
लामिछानेले सांसद पद ऐतिहासिक जिम्मेवारी भएको भन्दै जनताको भरोसालाई हरेक दिन महसुस गर्नुपर्ने बताए। शिक्षा, स्वास्थ्य, पूर्वाधार र रोजगारी जस्ता क्षेत्रमा भाषणभन्दा परिणाममुखी काम गर्नुपर्नेमा उनले जोड दिए।
उनका अनुसार सामाजिक न्याय स्थापना गर्दै प्रतिनिधित्वबाट छुटेका समुदायलाई प्राथमिकताका साथ समेट्नु पनि सांसदहरूको कर्तव्य हो। साथै उनले अहिलेको अवसर अर्को पुस्तालाई सजिलै नआउने भन्दै यही कार्यकालमा इमानदारीका साथ देश निर्माणमा लाग्न आग्रह गरेका छन्।
#RabiLamichhane #RSP #NepalParliament #NepalPolitics #DeshKoSwar